أوبزرفيشن – عن ديالوج مع عقارب الساعة

الهدوء يعم الغرفة …صوت الفراغ ..تتقطعه دقات عقارب الساعة.. دقة..دقة.. بلا توقف او تأخير .. بينما كان يجلس صامتاً على كرسيه الخشبي أمام نافذة متسخة، تحدثه أفكاره..

الدنيا إتغيرت.. الوقت بيجري بسرعة..قطر مبيقفش..ثانية تجر ثانية.. دقيقة تجر دقيقة.. طابور دقايق..ستين دقيقة مينقصوش ..تكتمل الساعة.. الساعة تجر إلى وراها لحد ما الدنيا تضلم واليوم يخلص .. تقوم الشمس طالعة تاني.. بس المرة دي بإسم مختلف إنهاردة إسمه 18 سبتمبر مش17.. ودي تفرق

b250692b93

علمونا في المدرسة إن اليوم 24 ساعة بالظبط.. مينفعش يكون أقل.. بس أنا حاسس إنه ينفع…. حاسس إن اليوم أقل من 24 ساعة… أكيد عقارب ساعتي مبتكملش لفة كاملة.. أكيد في ساعة ضاعت مني ..من يومي… ضاعت او إتسرقت؟ إتسرقت مني إمبارح واليوم إلي قبله وإلي قبله وإلي قبله… ولسه بتتسرق… مين سرقها؟ وإتسرقت إزاي؟ يمكن وأنا نايم بالليل او بأكل؟

في توتر، ينظر في صمت إلى ساعته ثم يشير باصبعه عاليا: مش يمكن الواد الي بيجي ينضف البيت لعب في العقارب؟ شكل إيده طويلة.. لا لا لا أكيد مش هو! هيستفاد ايه؟ .. يمكن بيقدم الوقت وعاوزني أموت بدري..قبل معادي.. ويسرقني..صح! يسرق البيت والساعة! وبعد كده يرجع يظبت عقاربها تاني! بس هكون أنا مت خلاص…. طب أروح اسأل الجيران الساعة كام؟ لا .. أضمن منين أنهم كمان مش متفقين عليا؟ او يمكنهم كمان بتتسرق منهم ساعات ومش عارفين .. طب اتأكد إزاي؟

“الإحساس ده جالي دلوقت.. زمان عمري ما حسيت به .. زمان كان اليوم طويل.. تأخد حقك 24 ساعة كاملين..علشان الدنيا كانت ماشية بالراحة .. وحدة وحدة .. ناس راكبة عجل .. عربيات بطيئة ….. حياة بطيئة …طب وأنت مستعجل ليه؟ لا مش مستعجل، أنا بس بقول إنه كان أحسن.. تركب عربيتك وتسوق على مهلك وتكون مبسوط.. علشان عارف إنه ده العادي .. هي دي سرعة العربية ..هي دي سرعة الدنيا… ويوم ما تسأل نفسك سؤال .. ممكن تقعد أسبوع تدور على إجابته وسط خمسين كتاب تقرأهم في مكتبة جنب بيتك.. او بعيدة حتى.. او لو كنت مسافر وبتبعت جواب تستنى شهر على ما يجيلك الرد.. دلوقت كل حاجة مبتاخدش وقت.. تبتدي وتخلص بسرعة.. ملهاش طعم بس المشكلة إننا جربناها وإتعودنا عليها .. وأي حاجة غير كده تبقى أكنك عايش في فيلم بالتصوير البطيء

طب أنت لخبطني دلوقت .. إيه الحل؟ الحل إني مشلش عيني من على عقارب ساعتي لمدة يوم بطوله.. ساعتها بس هتأكد إني فعلاً بعيش ساعات يومي بالكامل.. ماهو ده حقي!
مش مهم يضيع يوم بس اتأكد إن وقتي مبيضشع .. طب إفرض لو إنهاردة متسرقتش..ايه الي يضمن لي انه بكره العقارب ترجع متلفش تاني وإني متسرقش؟ خلاص أفضل قاعد قدام الساعة بكره كمان… طب وبعد بكره؟

لذلك ومن أجل الحفاظ على حقه في الساعات المتبقية من عمره، إشترى ساعة حائط كبيرة وقرر الجلوس أمامها طوال اليوم وبلا توقف لمتابعة حركة عقاربها ويتأكد أنه قد حصل على ساعات يومه كاملة

النهاية